ليه أكتب؟ لأن الأرقام لها صوت .. وأنا أحب اسمعه
ما بين ضجيج الأرقام، وتكدس التقارير، والنشرات اللي تمر كأنها ما قالت شيء
بدأت أحس إننا نحتاج نوقف شوي، نلتقط أنفاسنا، ونسأل بصوت عالي:
"وش قاعد يصير فعلا؟"
أنا مراد الزهراني
محلل مالي، كاتب اقتصادي، وأهم من كل هذا: شخص يحب يفهم، ويحب يشرح إذا فهم.
الأرقام؟ أحب لغتها.
بس اللي يشدني أكثر هو القصص اللي تخبيها بين سطورها.
لأن الأرقام لها صوت… الأرقام تتكلم، بس تبغى أحد يسمعها.
فتحت هذي المدونة لأني مؤمن إن الاقتصاد ما هو حكر على النخبة،
ولا مفروض يظل محصور في جداول وفواصل عشرية.
الاقتصاد نعيشه قبل نقرأه،
نحس فيه وإحنا ندفع في البقالة،
نشوفه في فواتيرنا،
نحس فيه كل ما طلعنا ندور سكن أو نشتري شي.
ليش ارتفعت الإيجارات؟
ليش قلّ الطلب على أشياء كانت تمشي بسهولة؟
ليش فجأة صار سعر الكيلو أرتفع؟
في هالمكان، راح أتكلم عن كل هذا، التضخم، والفائدة، والبطالة، والسوق، والايجارات، والاسهم، وحتى الطماطم.
بس مو بلغة الناس المتخصصة،
بل بلغة الناس اللي في النص.
اللي يحسون، ويفكرون، ويدورون أحد يقول لهم: "هذي السالفة، وكذا صارت".
لأن الأرقام ما تكذب.. بس كثير يتركونها تتكلم لحالها.
وأنا هنا عشان أترجم صوتها بصوت يشبهنا.
إذا كنت من هالناس، فـ هذي المدونة كأنها مكتوبة لك.
تحياتي...